Шуак

Возьмамтэ шорысь Дэбесысь искусствоосъя школалэн концераз вуиськиз. 

Дотово мылкыдэз жути"зы - одигез эктон пуктэмын вал Муржол underground-я. Бейби, мынам вань турбоз"игар... - нылпиос дотово серьезныесь, дотово тыршыса экто. 

Популярность, мар шуод на))))

Юртты, мыным, Кылдысин, юртты!

Мы - суперудмурты

Городэн гурт вискын

Паймисько - макем картэлэн атаез яратэ вордиськем гуртсэ. Со гурт али овол ни, 80-ти аръесы кужмысь быдтэмын. Вань улисьессэ Туймыйылэ выжтиллям. Уг валаськы - малы озьы каронэз вал. Бадзым гурт, клубез, фермаез, курег гидэз вылэм, интыез туж шулдыр - кык чыпет, яр, нюлэс. Нимыз усто - Тыршись. Соку ик валамон, кыче калык лыктэм отчы Зуннялась.  Нош али шып-шып, урамен-урамен сыло льомпуос, грушаос, улмопуос, сутэрпуос. Тулыс сяська зынэн кудзоно. Верантэм чебер.
Кемалась овол - отчы огназ пиосмурт улыны интыяськиз. Вахитов Борода Петягай. Мынам тодэмея - Лев Вахитов режиссерлэн матысь чыжы-выжыез. Куд-ог дыръя вожъяськисько солэн улэмезлы.
Папамы туж мозме. Чем-чем ветлэ отчы матысь эшеныз - тожо отын вордиськем пиосмуртэн. Люкмесэ пыро, чорыгало, мерттисько отчы, эшшо одиг пруд чыпизы,  вожало палэнысь адямиос отчы шутэтскыны ветло ке, бервылзэс утялто. Папа отчы корка пукто шуэ. Вери, пе, будиз ке, мотикен дорам ветлоз))).
Но мон вот мар сярысь. Зэм, дыр, адями кытын будиз - отын улыны кулэ. Вот ми - быдэс поколение - кошкимы городэ. Гуртмылэсь люкиським, город борды ом лякиське.
Конечно, вань улонмы городын - эшъес, уж, нылпиос будо. Но се ромно - гуртэ ми БЕРТИСЬКОМЫ. Значит, дормы отын. Сюлэм кыске, коркалэсь гинэ но мозмоно. Отын ганяк, шулдыр, капчи, сюлэм ик югыт луэ. Отын милемыз котьку яратыса возьмало, отчы пичи дыр кылемын, юрттиськоно но.  Сюлэм но чигиське анай-атай милемыз келяса огназы капка азе кыле ке, кошкем но уг пот. Нош мукет ласянь - гуртын одиг-кык арня улиськод ке, уката ик толалтэ, писыръяны кутске ни - городэ! Уго эшъес овол, шулдыръяськон интыос овол, потыны некытчы, калыкез троссэ ум тодиське ни, иворъес номыр сярысь уг верало.
Нош городлы но ми ноку родня ум луэ. Овол ми отын будэмын - мукетэсь. Нылы жаль потэ - мар пичи дыр луоз городын? Великен таман уд ворттылы, чукнаысен пеймытозь урамын ышыса уд улы, чыпетын лызэктытозь уд пыласькы,  складъести-сушилкаости уд бызьылы, эшъесын костёре уд пота. Тю!

Нош  мар луоз, гуртэ нокин доры бертаны луиз ке? Жалесь ми.


Тыршисьын

Шулдыр луиз, ой, эшъесы, ми ти шоры учкыса

Камалиез адзыны ветлим.

Кемалась верам потэ ни вал - кыче умой соос вань шуыса. Камали ой ке луысал, мар удмуртсэ кылзиськысалмы Вериен? Нош али со котькуд чукна мынэ музыкальной центр доры,  дискез улзытэ но,  Юлялэн "Чупырес" кырзамезъя эктыны кутске. Коть 5 час чукна медло. 

Ар чоже воштиськиллям пиналъес, будиллям, асьсэды сцена вылын мукетгес возе. Туж-туж синмаськи Полиналы. Сыче со чупырес, шаплы - прямо вешано кадь. А Юляез мон куке но точно куртчыло)))). А эшшо Никита! Дотово деловитой, пичи воргорон-мужичок. Кельшиз нылъес но пиос сярысь кырзан. Кылъесыз Черновалэн, оказывается. Молодец, Лудкече.

Аннок, конечно, зечок. Аслам блоге, аслам сузэре, ушъяло ай. Туж кельшо кырзанъесыз - мукетэсь. Сыче, кыче мон яратисько. Ачиз быръе, ачиз берыктэ. Мед, удмурт крезьгур но портэм луыны кулэ. А куараез!  Нечестно, конечно, люкемын быгатонлыкъес милям семьяямы.

Бадзым плюс - номеръессэс декорациосын шулдыртэмзы, ог-огзылы юрттиськемзы, мамаосты сцена вылэ поттэмзы - сыче шуныт мылкыд кылдиз, соослэн юрттэтсытэк, зэмзэ но , номыр ой пормысал, дыр. Минус - концертэз нуисьеслы ой оскы. Коня ке ганякгес бы. 

Студилэн репертуарез бадзым ни. Умой. Кемалась овол - адзи удмурт нылпи кырзанъесын книга. Ог 400 пала дыр бамъесыз - воксе пайми.  "Мынисько мон школае" но "Зольгыри" сяна номырзэ уг тодиськы. Камалиослы луыса, туала пичиос тросгес тодозы.

Пожалста, азьланяз но ужалэ. Ужды  туж но туж кулэ.

Картошка но удмурт кыл

Ветлиськом массаже. Верилэн коляскаын пукемез уг поты,  вань сюресэз соин вераськоно луэ. Больница возын гуртысь сиенэн вузкарыса сыло.
Доре бертыкумы ни, одигез вузаськись кыдекысен ик шорам вазьылэ:
- Нылпиеныд шалтыр удмурт сямен вераськиськод ук! Ми эшъесыным шумпотыса кылзиськиськом. Городын не больно-то удмурт кылэз кылод! Молодец! Молодец! Ме, мон тыныд со понна ведра картошка сето!

А шуо удмурт кылэз дышетыны номыр выгодаез овол.)))

Серекъялозы

Чужай тодаз вае.

Пересь чужае зуч гуртысь вылэм.  Бызем удмуртъес доры.  Шуиллям сое Зуч Саня. Выль улон интыяз картэз сое зуч сямен вераськыны уг лэзьы вылэм. А то, пе, серекъялозы.

Вот ведь кыче усто дыръес  вылиллям куке.

Солнечный зайчик

Мыным потэ, со ачиз но - солнечный зайчик. Пальпотись, шундые, паймымон энергетикаен адями.
Лев Александрович шуиз: художник -со адями, кудиз сюлэмлэсь сиоссэ вырзытыны быгатэ. Соку со ачиз но - бадзым букваысен художник.
Менсадык Гарипов сярысь киноез  куинетизэ учки ни. Синмаськисько. Сыче отын ваньмыз интыяз - инкуазь суредъес, гуртысь адямиос, гордань пияшъес, крезьгур, тодэ ваенъес. Вукоысь тузон но али изэм пызь зынъесты экран пыр но шодоно кадь.
Туж кельше интыез, кытын Владыкин тодаз вае, кызьы Гарипов халтурить каремзэ серекъя. Сыче мусо. Яратисько Гариповлэсь суредъессэ. Туж соос  "удмуртэсь", вашкалаесь и юморен. Верилы но кельше - ааать! шуэ, выж улысь мычиськем шырпиез адзыса.)))
Киноез учкыса, суредасез кемалась-кемалась тодиськод кадь потэ. Со ик вань, дыр, режиссерлэн выли быгатонлыкез.
Авангардэз уг валаськы, уг яратиськы. Но Орловлэн мур, визьмо вераськемез туж тунсыко. Суредъесыз шоры но мукет синмын учконо кадь.  Вахитов шуэ: шел по морозу, руки замерзли и у меня родился первый кадр - дети рисуют на снегу ладошками. Вот ведь художникъес- мынам кынмем вылам чай но позьы сяна нокыче малпанъес ой кылдысалзы.
Куинетиез  суредась сярысь ноку кылылэме ой вал. Инетын но номыр ик овол.  Учкисьесты герой сярысь информация утчатон - тоже ведь  режиссерлэн вормонэз. Кино туж жожмыт. Оглом россиысь гурт улон сярысь, творческой адямиослэн шугъяськонъессы сярысь малпаськытись.
Но самой зол мыным кельше, Вахитовлэн ужъесаз  адямиос зэмлыкоесь шуыса. Сычеесь, кычеесь соос зэмос улонын. Огшорыесь, визьмоесь, жадемынэсь, малпаськисесь, ужасесь... Мукет киноосын - персонажъес.
Туж потэ этнографияя ужъессэ учкеме. Мед лэсьтысал ни со сайт.

Юаныослы валэктоныос

Вообще - удмурт интеллектуальной шудонъес - туж зеч малпан. Альтернатива. Ми кадь казак пи, казак ныл арлыдэз ортчемъеслы дорысь потыны тунсыко муг.
Чемгес бы.  5 ар вис медам ни лу.
Шумпотымон, шудонэ 6 команда люкаськиз шуыса. Трос со.
Оло, форматсэ мукет сяменгес лэсьтыны луоно. Базаргес вал. Шуом, командаослы валэктонъессэс кагаз вылэ гожъяса сетоно. Жытэз нуисьлы но  юрттись кулэ. Умой - юанъес портэм удысъесысь вал шуыса. Честно озьы. Юанъес но тунсыкоесь - куд-огзэ валэктонъесты одно йыре кельтоно.
Ну мыным кельшиз, конечно. Вормись луиськод ке, котьку кельше. Мар веранэз, капитанмы милям - мозг. Со огназ быдэс  команда понна но шудыны быгатоз.
Тау Сашалы, Рябинкалы, Юриклы но Наталья Леонидовналы шудонъесы пыриськыны мылкыд каремзы понна.

Пальпотон

Пумиськи нылпи садысь воспитателеным.  Алнашысь "Родничок" садикысь  Юлия Леонидовна Трескина.
Ог 15 ар ом адскылэ, дыр. Воштиськем со. Арлыд сярысь вераськон потиз. Люля Леонидовна шуэ:
 - Адзи чош дышетскем эшме. Со шуэ: "Юляяя, тон сыче пересьмемед". Расстроилась. Доре  берти, синучкон азе султи. Ну да, кисыриосы трос - мар карод на. Собере учкисько но: таиз кысырие мынам серекъямлэсь потэмын. Таиз но. Таиз но. И таиз но. Ма мон чик овол на пересь! Трос серекъясько просто!

Ну классный уг со! 

3 сюан гур

Мон соглаш - со паймымон кышномурт.

Вообще - котырласянь. Нырысь ик - кызьы кадь, вордиськем палъесыдлэсь уно ар чоже палэнын улыса, анай кылын вераськытэк, сое кылытэк, калыкедлы сыче мур яратонэз утьыны быгатод. А солэн яратонэз котькуд кылысьтыз пачыла. 

Собере - мон понна валантэм - кызьы адямиос дисьто моноспектакль возьматыны. Кыче выли быгатонлык, аслыд оскон, дыр но тодон-валан кулэ, быдэс залэн огнад ваче син кыльыса, сомында портэм адямиослы тунсыко луон понна. 

Эшшо монэ паймытиз на Ольга Яковлевналэ быдэс кылыклэсь дунневаланзэ одиг шыркун вылын возьматэмез. Нуны веттан но со, валес но, дуннеос вискын выж но, пыж но. Кызьы сыче малпан вообще может йыре лыктыны? Вот зэмзэ но - все гениальное просто.

Уг шуы - спектакль туж-туж яраз шуыса. Сыче мукет, альтернативной, искусстволы дышыны кулэ. Но со туж но туж тунсыко.

Малы ке но   кельшизгес  возьматонлэн куинети люкетэз - кулон сярысь. Мыным потэ, адямилэн лулыз зэмзэ но озьы люкиське мугорыныз - векчи гырлыен каллен жингыраса.  

Малпаськонэ уси -  кыкез сюанэ ортчемын ини.  Мултэсэз улонын укыр трос. 

Мылкыд гинэ кулэ

Удмурт кылэз дышетонлэн кулэлыкез сярысь юан султыку, котькудиз малпа - мар сетоз солы удмурт кыл. Кыче табыш со яке нылпиосыз поттыны быгатозы та тодонлэсь.

Берло ченгешонъесын туж трос гожъяло со сярысь - удмурт кыл воксе кулэ овол, сое дышетон - юнме дыр быдтон гинэ, туала дуннеын  со номыр сетыны уг быгаты.
Янгыш со. Ваньзэ, маин удмурт кыл узырмытыны быгатэ , аслыд басьтыны мылкыд гинэ кулэ.

Коня интыын ужай - ваньмаз монэ кутизы удмурт кылэз тодэмелы луыса: "Удмурт дунне", ленинкаысь шаертодонъя отдел - валамон, федерал инспекторлэн аппаратаз кулэ вал огшоры ужез быдэстись сяна, сайтсылэсь удмурт бамзэ лэсьтись, а университетэ - удмуртъес бордазы ужаны отизы. Озьы мон туннэ нуналлы быгатисько шуыны - удмурт кыл монэ сюдэ.

Жыны Россиез -Мордовия, Марий Эл, Коми, Татарстан, Карелия, Москва, Петербург -   котыртыны но кунгож сьоры но ньыль пол вуылыны шуд усиз  "Шундылэн" ужаз пыриськемлы луыса.

Коня  ужрадъес - Вамышъес, Шундыкар, АФУН, МАФУН, удмурт дискотекаос, форумъес, конференциос, портэм семинаръёс, огшоры кенешонъес - кыче тунсыко, шулдыр но пайдае ортчизы соос. Коня выль тунсыко тодматсконъёс кузьмазы - Кольчурина, Немечкин, Цыкарев, Палган, Наташа Антонова,  Артем Малых, Витя Банк, Сергей Касьянов, Чемышевъес но трос-трос мукетъесыз. 

Эшшо удмурт кыл кузьмаз мыным зэмос эшъес - Чернова, Вери Степанова, Габитушка, Углан, Байковъес, Васильевъес, Кузнецовъес. Соослы мон оскисько, тодисько - соослы котьмар вераны луэ - котьку валаны-юрттыны тыршозы, серекъялом чошен. А зучъесын мон эшъяськыны матысь уг быгатиськы. Уг тодиськы малы, туж зеч тодмоосы вань ке но.

И зарнибугор удмурт картме но мон удмурт дискотекаысен пумитай. Тау Н. Соловьевлы сое радъямез понна))).

Ваньзэ тае улонысьтым куштыны ке - вераны но, тодэ вайыны но немыре.
Удмурт кыл - быдэс дуннеез усьтэ-кузьма. Жаль, со дунне удмурт кыллэсь палэнтиськем егитъеслэн палэнтизы ортоз шуыса. 

Ойдолэ позитивнойгес луом, эшъес

"Удмуртъеслы номыр кулэ овол!!!!", "Удмуртъес номыр уг лэсьто!!!" выллем истеричной верамъесты кылисько - лыдзисько ке, огдыре  бордэм но потэ,  йыры но дотово кур луэ.
Ну нырысь ик, озьы вераськыны яратисьёс, удмуртъёс, кудъесыз кылзэс утен понна портэм сямен, портэм амалъесын ужало-тыршо, - трос. Нош удмуртъес, кудъесыз мыло-кыдо кылзисько-учко-пырисько соослэн лэсьтэм ужазы -  трос эшшо но .   Малпаське ай, кыче ти соослэсь мылкыдзэс куашатиськоды, озьы вераськыса. Амалтэк ведь киоссы лэзиськозы. И вот соку, зэмзэ но, - удмуртъес номыр уз лэсьтэ.
Кыкетиез - овол ваньмыз сокем урод, учке ай котырак. Мон дас одиг ар талэсь азьло городэ  лыкти - соку малпаны но уг луы вал, удмурт кафеын  удмурт видео-арт учкыны луоз шуыса. Капчиен но чаляк номыр уг лэсьтиськы.
Куинетиез - паймисько, малы ти малпаськоды, удмуртъеслы гинэ номыр кулэ овол шуыса. Туэ, куке мерлыкын дунъяське индивидуализм но рационализм - вообще кинлы мар кулэ??? Куке но форумысен кенеши бигер нылашен, со туж куректыса вераз - егит бигеръеслы кылзы но культуразы чик кулэ овол шуыса, туж тросэз, пе, зучомо. Нош ми соосты пример кожаськом.  Яке,  егит зучъеслы калык культуразы дотово кулэ? Хех.
Ньылетиез - адямилы сю пол  " тон парсь" шуид ке, со парсь ик луоз. Ойдолэ уродзэ автостереотипъесы ум юнматэ. Ну пожалуйста!  Озьы малпаськоды ке но, пыр шара эн вералэ. Асьтэ сярысь в частности ти ведь урод уд вераськиське, малы ас калыкед сярысь озьы вералод?Шуэ - удмуртъес шаплыесь, визьмоесь но сабырлыесь. Ваньзы мед озьы лыдъялозы. Ми но.

Арзэ-анай

Верилы арес.
Осконтэм кадь. Усьтыр-табыр ортчиз та ар, валаса но ой ву.
Али мон соглаш, кышномуртлэн улонэз - нылпи будэтон понна шуыса. Соин номыре чошатыны уг луы.
Куке но чужапае шуиз вал: "Нылпи вордиськем бере улон 180 градуслы берыктиське но воксе мукет пала кошке". Зэмзэ но озьы вылэм. Да и вообще - со тынад улонэд овол ни. Пока нылпиед пичи, тиляд улонды  кык муртлы одиг. И тынад самой бадзым кышканэд но самой бадзым куронэд - со сярысь.
Трос выльзэ тоди ас сярысьтым ар чоже. Зечсэ но. Кылсярысь, быгатисько уй чоже 16 пол султылыны и нуназезэ изьытэк ортчытыны. И озьы трос-трос нуналъес чоже. Быгатисько 10 килограммъем коляскаез, 8 килограммъем нуныез и сиен-юонэн сумкаез одиг кутскемен 7-ти этаже тубытыны.
Уродзэ но. Мамамы милемды одиг пол но черектиськытэк будэтиз, мон озьы уг быгаты, дыр. Дырын-дырын психоватьтисько. Возьыт. Оло, уйёссэ изьыны кутски ке, ортчоз.
Куке но учки кино. Нимаське "Материнство". Отын Ума Турман, 3 нылпиослэн анайзы, даже ураме но ночнушкаен пота. Малпай - ууууг, мынам нылпие луиз ке, мон се ромно асме чаклало. Ха. Ку берпуметизэ каблукен туфли дисялляй меда? Ар но жынылэсь трос ортчиз ни точно.
Малпай - декретын наконец-то диссертация бордын ужало. Мон компьютер сьорын пуко, нылпие возам шудоз. Ха-ха.  Вождэс эн вае, Галина Аркадьевна.
Малпай - картэлы тырмыт дыр висъяло, ческыт сюдо. Ха-ха-ха. Чернова верамъя, "у нас к каше сегодня йогурт".
Но кыче умой анай луыны. Кыче умой малпаны, кин ке тонэ котьку-котьку яратоз, кин ке понна тон котьку-котьку самой матысь адями луод шуыса.
Нош куке нуныед, пичи киыныз бордад зыгырскыса, умме усе, куке со жин-жин серекъя, куке шумпотыса киоссэ выллань жутэ - "бааадзым будиии!" - инбам тонэ чупа кадь. Уть, Инмаре, милесьтым нылпиосмес.